Leider isch o di schönschti Reis mau ds Änd L

Mir höcklä jetz grad ds Perth am Flughafä u wartä ufs Bording. Dr Flug startet am 22.05 u mir sötä när morn am 12.30 ds Chlotä landä. Dr Klimaschock isch scho vorprogrammiert, hüt si mir nomau bi 34 Grad am Coogee Beach gsi u morn versinke mir öpä de scho fasch im Schnee. Es isch eifach genial gsi hei mir di letschte 6 Täg no bi Ueli & Marlise dörfä si, hei dasmau gnuä Zit gha für Perth und Umgäbig ds erkundä. Es isch u bliebt eifach eini vodä schönschtä Gägendä wo mir bis jetz gseh hei.

Mir wettä üs uf däm Wäg nomau härzläch bi Ueli & Marlise bedankä. Sie si üs scho bir Planig mit Rat u Tat zur Sitä gstangä u das mir ire Hilux hei dörfe bruchä isch natürlech dr Hammer gsi. O das mir hie während sächs Täg hei dörfe Wohne u dir immer so fein kochet heit, isch für üs nid säubverständlech. Merci viu viu mau!!!

Mir hoffä das mir euch mit üsem Blog o chli a derä Reis hei chönä la teilha u wetä üs für die viele Kommentär u Gästebuechiträg bedankä. Mir freue üs euch weder ds gseh.

Am erschtä Tag vo üsem Ufenthaut hie ds Perth, si mir uf Fremantle. Üs gfaut dä Stadtteil extrem guet. Es het hie mega viu schöni auti Gebäude und sehr viu gmüetlächi Beizli. Am Nami si mer när no ga z autä Gfängis vo Fremantle aluegä. Isch sehr idrücklech gsi. Bis 1991 si dert no Gfangnegi zu sehr schlimmä Bedingigä igsässä (nid so wi ir Schwitz).

Am zwötä Tag si mir mit dr Fähre uf Rottnest Island. Die Inslä isch ca 11km läng u 4km breit. Mir hei dert äs Velo gmietet u si drumum gfahrä. Mir si so vo Büchtli zu Büchtli gfahrä u hei di trouhafti Ussicht gnossä. Ungerwägs hei mir sehr viu Quokkas gseh. Die frächä Cheibä, si eim fasch i Rucksack ine, wüu si uf dr suechi nach öbisem Ässbarem si gsi. Sie stammä vode Kängurus ab, gseh aber eher us wi ä Mischig us Känguru, Ratte u Koala. Si mega luschtegi Tierli.

Dr dritt Tag isch ganz im Zeiche vo Perth u Kings Park gschtangä. Mir liebe die Stadt eifach :-) Hei üs bim Shoppä richtig chönä ustobä !!!

Hüt si mir mit Ueli und Marlise vo Fremantle uf Hillarys gfahrä. Dert drzwüschä hets ganz viu schöni Stränd. Voraume der Cottesloe und Scarborough Beach. Mit däm Ablick und am wüssä dases ir Schwitz minus Grad isch, faut üs der Abschied vo Oustralie no viu schwerer. Speter simer dür z Swan Valley ä Stoudam ga aluegä, mit Zwüschästopp im nä coolä Pub. Am abä si mir z nöie Huus vo Ueli und Marlise am Coogee Beach ga aluegä. Ds Huus het ä wunderschönä Meerblick und isch z Fuess nur 5 Minutä vom Coogee Beach entfernt. Si wettä z jetztigä Huus müglechscht gli verchoufä u dert achä zieh. Es müessä aber zur Zit no äs paar Renovationä gmacht wärdä u darum steits ids no läär. Hei üs mit Campingtisch u Stüeu bewaffnet ä Pizza la cho und dr wunderschön Sunnäungergang gnossä.

Die letschtä zwöit Täg wärdä mir äuä eifach no chli dr Strand, z Meer und d Sunnä gniessä, bevors am Sunntiabä wider zrüg id Schwitz geit :-(

Miterä riesigä Vorfreud hei mir üs am Sunntimorgä ufä Wäg richtig Green Head gmacht. Mir si härzlich im Huus vom Rod empfangä wordä. Dr Rod isch scho 72gi u macht sie Sea Lions Tour eigentlich nur no zur Freud. Nur dür nä Gheimtipp si mir uf dä cho, wöu Wärbig macht är eigentlich keni u o sis „Büro“ hei mir chum gfungä. Mir hei üs mega gfreut wo mir vo ihm erfahrä hei das mir di einzigä zwöi für dä Tag si. Normalerwiis macht är die Tour ersch ab 4 Pärsonä. Aber be üs het är ä Usnahm gmacht. Mit sim Böötli si mir ca. 20 Minute zur Inslä usä gfahrä. Dr Rod isch dr einzig wo zu derä Seelöiä-Kolonie geit. Es isch die zwöit gröschti Kolonie vo Weschtaustralien. Chum hei mir üs derä Inslä gnecheret, si scho di erschtä Seelöiä freudig is Wasser gschprungä u zum Boot gschwummä. Mir si über 1.5 Stund mit denä Selöiä am schwümmä und spiele gsi. Sie hei mega freud wemä chli Radou im Wasser macht wie zum Bispiu ufs Wasser schla oder Rollä träiä. Sie machä eim de aues nachä. Sie heis o luschtig gfungä wemä sä probiert het ds fa, wöu den hei sie eim när zeigt wär dr schneuer im Wasser isch :-) Zersch isch vorauem dr chlii u sis Mami mega verspielt gsi. Aber när si ono drü grösseri Bullä ( ca. 2.5 Meter läng ) cho u si genau glich verspielt gsi wie di jungä. Das isch eis vodä schönschtä Erläbniss gsi uf üserä Reis. Am Nami si mir när i Nambug NP ga Pinnacles ga luegä.

Geschter hei mir zerschtä mau chli schlächts Wätter verwütscht, bis jetz hei mir jedä Tag Sunnä pur gha. Mir hei churz vor Perth no ä Abstächer i Yanchep NP gmacht. Dä Nationalpark isch bekannt für sini Koala’s u Känguru’s.

Am Nami si mir weder ds Perth be Ueli u Marlise acho, es isch fasch wie es heicho gsi :-)

Die letschte 6 Täg vebringä mir jetz no hiä ds Perth u Umgäbig. Jetz machä mir üs grad parat für uf Fremantle. Mir wärdä sicher ändi Wuche de nomau chli Fotis ufä ladä.

Glücklich weder usem Sang zrüg J Wie befürchtet isches im Francois Peron NP sehr sandig gsi. Us däm Grund muess jedä 4x4 Fahrer wo dert inä wot zersch afä mau d’heufti Luft us dä Pnö la. Jetz wüssä mir o was dr Unterschied zwüschem normalä Sand u Soft Sand isch. Mir hei amnä armä Kärli müesse häufä si Charrä weder usem Sand ds ziä. Dä isch allei kei Meter meh witer cho. Das het natürlich ned grad Bitragä dasmer üs mitemä besserä Gfüeu witer id töifi vo däm Nationalpark gwagt hei. Es paar mau hei mir dr Hilux rächt müesse drückä das üs ned grad ds gliche passiert. Heis aber jedesmau gschafft die prekärä Situationä ds meischterä. Mir si när mit atemberoubendä Küstälandschaftä belohnt wordä. Ds Spezielle a däm Nationalpark isch, das ds Outback mitem rotä Sand diräkt bis as Meer chunt. Übernachtet hei mir o grad i däm Nationalpark. Mir si ganz allei ir Einsamkeit gsi. Hei üs am wunderschönä Stärnähimmu chum chönä satt gseh.

Am nächschtä Tag si mir de glich froh gsi weder chönä ds Düschelä u dr rot Sand ab ds wäschä. Si am gliche Tag no uf Kalbarri i Nationalpark gfahrä. Dä isch vorauem für sis Natural Window u für sini Flöigäplag bekannt. Da mir ungerwägs es paar Schwizer hei troffä u üs die vorgwarnet hei, hei mir es Flöigänetzli kouft J Gseht zwar scheisse us aber di Vicher triebe eim süsch i Wahnsinn.

Jetz si mir grad ds Gerladton u freue üs riesig uf morn. Den geits nämlich zudä Seelöiä….

Mit ä chli Wehmuet hei mir üs vo Coral Bay verabschiedet. Üs hets dert extrem guet gfauä. Mir si när via Carnarvon richtig Monkey Mia gfahrä. Uf däm Campingplatz hei mir ds grossä Glück gha, ä Stellplatz diräkt am Strand ds übercho. Isch eifach herrlich mitem Blick ufs Meer i ds schlafä u am nächschtä Morgä weder ds erwachä. Bim Zmorgä ässä hei mir scho di erschte Delfine ir Bucht gseh schwümmä. Ä wunderbarä Start i dä Tag. Am 8i isch di erschti Gruppe vo 6 Delfine ganz nach a Strand cho. Dr Grund warum die Delfine i nur chnöitöifs Wasser chömä isch, dass sie aubä vodä Ranger mitemä Fisch belohnt wärdä.

Am Nami si mir uf Denham. Das härzige Dörfli hei mir scho us dr Sändig Fernweh vom SF1 kennt. Hei no churz dr Kirtsy ä Bsuech abgstattet. Sie isch o ir Sändig vorcho u zwar aus Känguru-Mami. Sie zieht aubä die verwaiste Kängurubaby’s gross. Sie het mega freud gha wo mir ihre verzeut hei das mir sä im Fernseh gseh hei u ihre churz hei wöuä cho hallo sägä. Sie hät üs sehr gärn sones jungs Känguru zeigt aber sie het leider ( oder eigentlich zum Glück ) zur Zit keis Waisechind dahei. Am Abä hei mir ä super BBQ-Stell diräkt am Meer gfungä, leider si mir ned allei gsi….. üs hei ca. 40 Möwä beobachtet u ghofft es gheit üs öpis achä. Wemä inä dr Rüggä zu dräit het, hei die frächä Siechä eim sogar dr Mozarella usem Salat klauet !!!

Morn chöit dir üs ganz fescht Dümä drückä, mir gö nämlich i Francois Peron Nationalpark. Dä beschteit vorauem us töifem rotem Sand, blauem Meer u steilä Klippä. Hoffä das mir dr Hilux ned im Sand versänkä J

Am zwöite Tag im Cape Range NP si mir am Morgä früech am Yardie Creek ga wanderä. Da mir scho am 06.30 gstartet si, si mir ganz allei für üs ungerwägs gsi. Wobie ganz allei si mir den glich ned gsi. Mir hei dert extrem viu Kängurus gseh, mit eim wärä mir fasch zämä gstossä, wöu mir u ds Känguru üs ned gachtet hei das mir dr glich Wäg wei nä, mir gloube zwar, dass ds Känguru no fasch chli meh verchlüpft isch aus mir J

Am gliche Tag si mir när richtig Coral Bay ufbrochä. Hei hie ä wunderschönä Campingplatz verwütscht ( mit Gras u Palme! ) bis jetz si mir eher rotä Sand u vertrochneti Gebüsch gwöhnt gsi. Ca. 1.5 km vom Badestrand entfernt, isch zur Zit dr Bruetplatz vodä Riffhaie. Das einmalige Naturschouspiel si mir natürlich ga aluegä. Es isch zwar scho chli es komisches Gfüeu gsi wemä so bis zudä Chnöchlä im Wasser schteit u nur 5 Meter vor eim um di 20-30 Haie ihri Kreise ziä.

Hüt hei mir Tour mitem Glasbodäboot gmacht. Ungerwägs hei mir d’glägäheit gha am üsserä Riff ds schnorchlä. D’isä u ig si chli inä angeri Richtig ga schnorchlä aus di angerä Touris, was sich im nachhinein aus wahrä Glücksfau entpuppt het. Mir hei nämlich zwöi Wasserschildchröt enteckt u hei mir denä chönä schwümmä. Sie si überhoupt ned gstresst gsi u mir hei bis ufnä meter a sie härä chönnä. Das isch es Erläbniss wo üs ewigs wird i Erinnerig bliebä. Leider isch genau hüt morgä üsi Ungerwasserkamera kabutt gangä L Darum hei mir das Erläbniss ned bildich chönä feschthautä. Aber hei när ufem Glasbodäboot no d’glägäheit gha ä Schildchrot u ä Rochä ds fötelä.

So, ändlich hei mir weder mau Natelempfang. Nach 1500 km NÜT si mir ds Exmouth acho. Hei üs dert aus erschts ä wohlderdientä Beach- u Wöschtag gmacht J Am Abä si mir när ufnä Whale-Watching-Tour. Es isch dr hammer gsi. Mir hei vorauem Buckelwalä gseh. Leider isch kenä diräkt näbem Boot uftoucht aber so bis uf 25 Meter isch mä asä härä cho. Es isch mega schön ds beobachtä gsi wie verspielt die riese Kolossä glich no si. Hei ä Muetter mitem Junge gseh wo über 2 Minute ununterbrochä mit dr Schwanzflossä ufs Wasser gschlagä het.

Hüt si mir i Cape Range Nationalpark, wo berüehmt isch für ds Schnorchlä im Ningaloo Reef. Mir si kei Minute im Wasser gschtangä het üs scho ä junge Riffhai umkreist. Dä isch zwar scho nur ca 120 cm gsi aber es het üses Härz doch grad chli afä höcher schla. Ds Isi het sogar unger Wasser probiert ds schreie, was „leider“ mitemnä Schluck Meerwasser gändet het J Si aber när glich no ga Schnorchlä u hei no ab und zue sonä Hai diräkt unger üs gseh dürä schwümmä. Hie i däm Nationalpark hei mir zersch mau richtig viu wildi Kängurus gseh, bis jetz hei mir nur einzelni gseh u ned so ganzi Gruppenä. Bim fahrä muess mä würklich extrem vorsichtig si, die Cheibe springe eim andurend vorä Charrä u das ned nur ir Dämmerig.

Ändlech si mir in Broome acho. Es isch ds erschtä grösserä Stedtli, sit mir ds Perth abgfahrä si. Am erschtä Tag hei mir vorauem dr Strand gnossä. Am zwöite Tag si mir i Malcolm Douglas Wilderness Park. Mir hei dert üsi erschtä Krokodil gseh. Das si würklich sehr idrüklichi Läbäwäsä. I däm Park hets näbä dä Krokodil ono jedi mängi Kängurus, Dingos, Emu's u Schlangenä gha. Am Samsti morgä früech, hei mir üs den über 89 km Gravel Road u Sand richtig Cape Leveque gmacht. Dr Hilux het üs sicher u schnäu a üses Ziel bracht :-) Dr Strand bim Kooljaman Campingplatz isch würklich dr absolut Hammer. Bim badä hei mir sogar Bekanntschaft miterä Wasserschildchrot gmacht. Bim Sunnäuntergang hei mir no ä Gruppe Walä gseh verbi schwümmä. Es isch eifach dr perfekt Tag gsi ... :-) Morn machä mir üs ufä Wäg richtig Exmouth. Häbets guet u bis gli.

Mir si ds Tom Price ä Mine ga besichtigä. Es isch würklich sehr idrüklich gsi wie gross di Fahrzüg si. Eis vo denä Gfährt suuft allei uf 1 km 20 Liter Moscht, da si mir auso mitem Hilux no sehr guet bedient :-) Nach dr Mine hei mir üs ufä Wäg i Karijini NP gmacht. Üsä Campground isch sehr abglägä gsi u mir hei ir Einsamkeit ä sehr schönä Sonnäuntergang chönä bewunderä. Am Abä het de ds Isi di erschti grösseri Panikattackä wägerä Spinnelä gha. Die het üs leider dr Wäg krüzt. Gmäss dr Beschriebig vom Isi isch sie riese gross gsi u het dicki, wiisi Bei gha..... :-) Am nächschtä Tag si mir den id Schluchtä vom Karijini NP gangä, nacherä aschträgendä Wanderig hei mir üs idä wunderschönä Natur-Pool's chönä erfrüschä. Nachem Mittag hei mir üs den ufe Wäg über Port Hedland a 80 Mile Beach gmacht. Zmitts im niergendwo hets ä mega schönä Caravanpark gha. Am Abä hei mir dert einä vodä schönschtä Sunnäuntergäng gseh. 

Am Sunntimorgä früech, hei mir üs ufä Wäg richtig Nordä gmacht. Das heisst, 1400km überä Great Northern Highway dür ds Outback. Würklich viu hets haut i derä Gägend ned ds gseh gä. Trotzdäm isches sehr idrücklich gsi das mä mängisch ä Stund het chönä fahrä ohni es Outo ds chrüzä. Zur Zit si mir grad ds Tom Price ufem Campingplatz. Morn gö mir eini vode gröschtä Minä ga aluegä. Aschliessend fahrä mir i Karijini Nationalpark, dert het üs Ueli ud Marlise es paar sehr schöni Schluchtä empfohlä. I däm Nationalpark blibä mir zwöi Täg u fahrä när am Donnschti über Port Hedland nach Broome. No ä chlini Randnotiz zum Schluss, nach zahlrichä Reklamationä wei mir hiä richtig schteuä, es handlet sich bi üsem Gfährt ned um nä Jeep ( für es paar o amerikanischä Schrott ) sondern um nä Hilux !!! :-)

Hallo zaemae, Mir si guet in Down Under acho. Dr Flug isch sehr laeng aber agnaehm gsi. A uesem erschtae Tag simer scho unfaufrei (Linksverkehr) is Shoppingcenter und a Coogee Beach cho :-) Iz due mir de dr Jeep beladae, damit mir morn Morgae uesae Roadtrip choei startae.